新快报讯　（记者　任磊斌）星期日落咗成日雨，行街、食饭、睇戏都好唔方便。不过，记者喺道仲要提醒下各位市民，龙舟水一嚟，场场都大雨，出街嗰阵，至好避开容易水浸嘅地段。

前晚11点几，记者喺岗顶落班，啱啱（刚刚）遇正（碰上）挂红色暴雨警告。哇！岗顶好又多对出嗰个公交车站又变成大水塘。啲积水最深嗰时有40厘米深，车都埋唔到站，好多人根本上唔到车。呢嗰情况一路到禽日凌晨都无改善。稍后，记者仲了解到，起紧（建筑当中）嘅白云国际会议中心（即係以前嘅东方乐园呢）前面嘅立交底，半夜都浸到成米深。

记者采访咗市政部门，佢哋话，啲市政管道养护所应急队员已经周街咁扑（到处救急）。白云国际会议中心嗰边，因为施工对排水管道有影响，市政人员用咗6台大水泵抽到天光，先将积水搞掂。至于岗顶地带，佢哋话，旧年底已经改善咗嗰道嘅排水设施，但係短时间内雨势太大，加上猎德涌水涨，水位仲高过路面，啲水排唔出去。同样道理，成日水浸嘅中山一立交，都係因为沙河涌水涨倒灌入嚟所致。

大雨时节啱啱先开始咋，水浸街嘅场面可能会经常出现，所以市民出门前要唸好（想好）路线先出门口，尽量避开水浸黑点，比如话中山一立交底啦、天河路岗顶段啦、沿江西路同滨江东啦、康王路隧道啦、中山二执信路口同埋童心路环市路口呢啲地方，可以唔去就唔好去喇。

（侯颖／编制）