内地游港旅客投诉路上受到温情接待

新快报讯　（记者　任磊斌）记者前几日采访咗一单旅游投诉，係一班内地游客喺港澳游受尽屈辱嘅事（详细可以睇睇12号A10版嘅报道）。但今日想同大家讲吓嘅係采访当中记者注意到嘅少少花絮，当事人大赞香港人好有人情味。“‘今时今日，咁嘅服务态度未够嘎。’刘德华呢句香港公益广告词大家听得多喇。其实多数香港人都好有人情味，好有服务精神嘎。”当事人李先生咁讲。

4月21号一早7点半，李先生一行15个老人细路（小孩），拖住大袋细袋行入香港佐敦地铁站。“我哋当时係去北角（港岛东北部）揾香港旅游发展局投诉嘅。”李先生话，“入站嘅时候，啲老人家有啲阻滞，地铁员工即刻行过嚟协助。得知我哋係去投诉嘅，地铁仲同我哋开晒绿灯添。”

李先生话，佢哋每到一个站，就有专人带路，转咗好多次线，香港地铁公司冇收佢哋一分钱。“我哋先从佐敦到北角，听讲地铁炮台山站有香港旅游发展局嘅服务点，又转咗去炮台山；跟住又去铜锣湾揾港旅游业议会。地铁员工一直带路去到旅游业议会办公室大楼前边先至放心走人，全程历时足足嗰几钟。”

李先生好感慨咁话：“唔单止地铁啲人，我哋坐的士嘅司机、求助嘅阿sir（警察），仲有（还有）香港旅游发展局、香港旅游业议会接受我哋投诉嘅员工，都好热心，态度好诚恳。”

（侯颖／编制）